Beki wa Mgambo Shooting, (kushoto) akijaribu kumtoka winga wa Yanga, Simon Msuva, wakati wa mchezo wa Ligi Kuu ya Tanzania Bara, uliochezwa leo jioni kwenye Uwanja wa Taifa jijini Dar es Salaam. Katika mchezo huo Yanga imeiweza kuibuka na ushindi wa mabao 3-0.
Bao la kwanza lilifungwa na Beki wa Yanga, Mbuyu Twite, la pili lilifungwa na Hamis Kiiza 'Diego' kwa mkwaju wa penati baada ya wachezaji wa mgambo kumchezea faulo katika eneo la hatari mshambuliaji wa Yanga, la tatu liliwekwa kimiani na Didier Kavumbagu aliyefunga pazia la mabao hayo.
Katika michezo mingine iliyochezwa leo, huko mkoani Tabora, timu ya Rhino Rangers, imewabanjua maafande wenzao wa JKT Ruvu bao 1-0, na huko Mbeya Timu ya Mbeya City imeibuka na ushindi wa mabao 2-0 dhidi ya wenzao wa Tanzania Prisons.
Kwa matokeo hayo sasa Timu ya Yanga imepanda nafasi moja hadi nafasi ya tatu ikiwa na Pointi 22, huku Azam wakiendelea kuongoza Ligi hiyo kwa kuwa na Pointi 23 sawa na Mbeya City yenye Pointi 23 pia lakini wakitofautiana idadi ya mabao ya kufunga, huku Simba ikishuka na kushika nafasi iliyokuwa imeng'ang'aniwa na watani wao Yanga, nafasi ya nne.
Hamis Kiiza wa Yanga, anayemfukuzia Amis Tambwe wa SImba kwa idadi ya magoli sasa, baada ya kupata bao la tano hii leo, akiwatoka mabeki wa Mgambo.
Mashabiki wa Yanga, wakishangilia ushindi wa timu yao hii leo.
Mshambuliaji wa Yanga, Mrisho Ngasa, akijaribu kuwatoka mabeki wa Mgambo, wakati wa mtanange huo leo. Picha kwa hisani ya Bin Zubeiry
No comments:
Post a Comment