MWENDESHA Baiskeli wa Mkoa wa Arusha, Richard Laizer, ameibuka kidedea baada ya kuwagalagaza washindani wake zaidi ya 400, kwa upande wa wanaume katika mashindano ya 'Vodacom Mwanzan Cycle Challenge 2011' yaliyomalizika jana, jijini Mwanza. Kutokana na ushindi huo wa Richard, aliyetumia muda wa masaa 5:02:29 kumaliza mbio hizo, amejinyakulia zawadi ya kitita cha Sh. Milioni 1.5 na kuvikwa taji lililokuwa likishikiliwa na Hamis Clement wa Shinyanga aliyetumia muda wa masaa 5:02:28 kumaliza mbio hizo za kilometa 196, katika mashindano ya mwaka jana..
Mshindi wa pili wa michuano hiyo kwa wanaume ni, Mindi Mwagi, kutoka mkoani Shinyanga aliyetumia saa 5:02:29 ambaye amezawadiwa shilingi Milioni 1, akifutiwa na mshindi wa tatu, Said Jumanne, aliyezawadiwa kiasi cha Sh. 700,000, ambaye alikuwa akiuwakilisha mkoa wa Arusha.
Kwa upande wa wanawake Mkoa wa Arusha uliibuka kidedea baada ya mshiriki wake, Sophia Hussein, kuwabwaga washiriki wenzake zaidi ya 60 na kunyakua nafasi ya kwanza katika mashindano hayo ya kilometa 80 baada ya kutumia muda wa Masaa 2:25:13 kumaliza mbio hizo.
Hivyo kwa ushindi huo Sophia, amejishindia kitita cha shilingi Mil1,100,000 na kushikilia taji hilo lililokuwa likishikiliwa na Sophia Adison wa Arusha huku akifuatiwa na mshindi wa pili, Mwajuma Musa, kutoka mkoani Arusha aliyetumia Masaa 2:25:40 na kujinyakulia zawadi ya shilingi 800,000.
Hata hivyo mkoa wa Shinyanga nao haukuwa nyuma katika mashindano hayo baada ya Bi Salome Donard, kushika nafasi ya tatu ambapo alizawadiwa kiasi cha Sh. 600,000 baada ya kutumia Masaa 2:26:21 kumaliza mbio hizo za kilometa 80 kwa wanawake.
Akizungumza baada ya mashindano hayo,Richard Laizer alisema kilichomsadia ni mazoezi na maandalizi ya mara kwa mara aliyokuwa akiyafanya ingawa mlima wa Bugando wa kumalizia mbio hizo ulimsumbua katika mashindano hayo.
“Nashukuru kwa kumaliza salama na kuwa bingwa katika michuano hii, kutokana na zawadi hii niliyopata kutoka Vodacom Tanzania na wadhamini Wenza Serengeti Breweries kupitia kinywaji chake kisicho na kilevi cha Malta Guinness nitajiendeleza zaidi ili kufikia viwango vya uendeshaji baiskeli kimataifa,” alisema Laizer.
Kwa upande wake Bi. Sophia Hussein alisema mashindano ya mwaka huu kwake yalikuwa na upinzani mkali kwa sababu ushindani ulikuwa ni wa hali ya juu hasa wenye baiskeli za Phoenix ambao walikuwa hawampi nafasi.
Mkurugenzi wa Vodacom Tanzania Kanda ya Ziwa Bw Steven Kingu,ambae ndiye alikuwa mgeni rasmi aliwapongeza washiriki wote hususani washindi na kuahidi kwamba kampuni yake itaendelea kuratibu, kuandaa michuano hiyo ili kuifanya kufikia michuano ya kimataifa.
“Nimefarijika kwa mbio hizi za wazi za Vodacom Mwanza Open Cycle Challenge kuendelea kuwa bora kila mwaka na hili linatupa changamoto za kuendelea kuandaa na kudhamini katika mikoa mingine kama sio Tanzania nzima,” alisema Kingu.
Kwa upande wake Mkurugenzi wa Masoko wa Kampuni ya Serengeti Breweries Limited (SBL) Ephraim Mafuru ambao ni wadhamini wenza kupitia kinywaji kisicho na kilevi cha Malta Guinness alisema hawajutii kudhamini michuano hiyo kutokana na hadhi iliyonayo.
“Tumeshuhudia kupitia udhamini wetu washindi wamejipatia zawadi ambazo kama watazitumia vema zinaweza kuwa mitaji itakayowawezesha kujiletea maendeleo katika ngazi ya familia na Taifa kwa ujumla,” alisema Mafuru.
Mshindi wa kwanza wa mbio ndefu za baiskeli ”Vodacom Mwanza Open Cycle Challenge Kilometa 196, Richard Laizer (Arusha) akimaliza mbio hizo alipotumia Masaa 5:02:28 katika mbio hizo,zilizoanzia Shinyanga na kumalizikia jijini Mwanza,Mbio hizo ziliandaliwa na Vodacom Tanzania na kudhaminiwa na kinywaji cha Malta Guinness.
Mkuu wa Udhamini wa Vodacom Tanzaia, akimkabidhi zawadi ya shilingi 1,500,000 Mshindi wa kwanza wa mbio ndefu za za baiskeli za Kilometa 196 mara baada ya kuibuka mshindi katika mbio za ”Vodacom Mwanza Open Cycle Challenge,kushoto Mkurugenzi wa Vodacom kanda ya Ziwa Steven Kingu,watatu kutoka kushoto Mkurugenzi wa Serengeti Breweries Ephraim Mafuru, kulia Meneja wa Malta Guinness Mauruce Njowoka.
Mkurugenzi wa Serengeti Breweries, Ephraim Mafuru, akimkabidhi zawadi mmoja wa washindi wa mbio za walemavu ambazo pia zilikuwa moja ya mbio hizo katika mbio za”Vodacom Mwaza Open Cycle Challenge 2011 kudhaminiwa na kinywaji cha Malta Guinness.
No comments:
Post a Comment