*NAHODHA TWIGA STARS SOPHIA MWASIKILI KUCHEZA UTURUKI

Naodha wa timu ya Taifa ya Wanawake Twiga Stars, Sophia Mwasikili (katikati) akiwa na wachezaji wenzake wakati wa mazoezi yao ya pamoja hivi karibuni.

**********************************

Nahodha wa timu ya Taifa ya mpira wa miguu ya wanawake (Twiga Stars), Sophia Mwasikili ameondoka jana alfajiri (Januari 30 mwaka huu) kwa ndege ya Turkish Airlines kuelekea Uturuki kucheza soka la kulipwa.

Mwasikili ameitwa kwenda kujiunga na timu ya Luleburgazgucu Spor Kulubu inayoshiriki Ligi Daraja la Kwanza ya Wanawake nchini humo.

Beki huyo wa kati wa Twiga Stars aliyekuwa akichezea timu ya Sayari Women amejiunga na klabu yake hiyo mpya kwa mkataba wa miaka miwili.

Awali Mwasikili alitakiwa kujiunga mapema na timu hiyo lakini alilazimika kusubiri kwanza mechi ya marudiano ya Kombe la Afrika kwa Wanawake (AWC) kati ya Twiga Stars na Namibia (Brave Gladiators) iliyochezwa Januari 29 mwaka huu Uwanja wa Taifa, Dar es Salaam.