*YANGA KUPOKWA POINTI 3 NANI WA KULAUMIWA, TFF, KAMATI, AU UONGOZI WA YANGA?

KAMATI ya Ligi Kuu ya Vodacom Tanzania katika kikao chake kilichofanyika jana jioni  imetoa maamuzi ya kuipokonya klabu ya Yanga pointi tatu kufuatia rufaa ya Coastal Union ya Tanga, dhidi ya beki Nadir Haroub Ally ‘Cannavaro’.

Coastal ilikata rufaa baada ya kufungwa 1-0 na Yanga Jumamosi  iliyopita, ikipinga klabu hiyo kumtumia beki Nadir Haroub ‘Cannavaro’ ambaye inadai alikuwa hajamaliza adhabu yake ya kukosa mechi tatu baada ya kupewa kadi nyekundu kwa vurugu kwenye mechi dhidi ya Azam FC.

Akizungumza jijini Dar es salaam jana, Mwenyekiti wa Kamati hiyo, Wallace Karia, alisema maamuzi hayo yamefikiwa katika kikao ambacho yeye hakuhudhuria.

Wajumbe wengine wa Kamati hiyo ni Said Mohamed (Makamu Mwenyekiti), ambaye hakuhudhuria Damas Ndumbaro, Steven Mnguto, Geoffrey Nyange, Seif Ahmed, Henry Kabera, ACP Ahmed Msangi, Meja Charles Mbuge na Ahmed Yahya.

Hata hivyo, Yanga iliamua kumtumia Cannavaro baada ya Mwenyekiti wa Kamati ya Nidhamu na Usuluhishi ya TFF, Alfred Tibaigana kusitisha adhabu zote zilizotolewa na Kamati ya Ligi kuwafungia wachezaji watano wa Yanga kwa kufanya fujo kwenye mechi na Azam FC, ikiwemo kumpiga refa.

Tibaigana alisitisha adhabu zote akidai kwamba Kamati ya Ligi haina mamlaka ya kutoa adhabu, ispokuwa Kamati yake.

Kamati ya Tibaigana ilipanga kukutana leo kujadili suala hilo, baada ya kusitisha adhabu hiyo kwa wiki mbili.

 

Kwa tukio hili sasa ni nani wa kulaumiwa, iwapo Yanga waliamua kumchezesha Canavaro wakifuata kanuni za adhabu ya uwanjani ya kukosa mechi tatu huku wakijua kuwa ile ya Kamati tayari imesitishwa na hivyo kwa kipindi hiki haiwahusu na kumfanya mchezaji huyo kuwa huru.

 

Na TFF mbona haikuweza kutoa tamko lolote kuhusiana na mkanganyiko huu kuhusu adhabu hizo zilizotolewa na kamati ya Ligi Kuu, na adhabu hizo hizo zikisitishwa na Mwenyekiti wa Kamati ya Nidhamu ya Tibaigana, sasa ni nani mwenye mamlaka kati ya kamati hizi mbili ya kutoa adhabu kwa wachezaji kuhusiana na tukio hilo lililotokea wakati wa mchezo wa Yanga na Azam?

 

Yanga kwa upande wao katika lawama hii tayari wamejivua huku wakiegemea upande wa pili wa mchezaji wao kumaliza adhabu ya uwanjani na adhabu nyingine ikiwa imesitishwa na kabla ya kutolewa maamuzi mchezaji wao anakuwa huru kucheza hadi hapo atakapohukumiwa.

 

Je Ni nani mwenye meno juu ya hili??