KANZI DATA YA WATAALAMU WA KISWAHILI NI MUHIMU: KATIBU MKUU SUZAN

 Katibu Mkuu Wizara ya Habari,Utamaduni,Sanaa na Michezo Bibi. Suzan Mlawi (wa kwanza kulia) akizungumza na wafanyakazi wa Baraza la Kiswahili la Taifa (BAKITA) leo Jijini Dar es Salaam ambapo ameridhishwa na hatua iliyofikiwa ya kuandaa  Kanzi Data ya wataalamu wa lugha ya Kiswahili. Kulia kwake ni Naibu Katibu Mkuu wa Wizara hiyo Bw. Nicholous Willium.

  Katibu Mkuu Bibi. Suzan Mlawi na Naibu Wake Bw.Nicholous Willium wa Wizara ya Habari,Utamaduni,Sanaa na Michezo wakimsikiliza  Katibu Mtendaji wa Baraza la Kiswahili la Taifa (BAKITA) Dkt.Seleman Sewangi (kulia) walipotembelea ofisi hiyo leo Jijini Dar es Salaam.

 Katibu Mkuu Wizara ya Habari,Utamaduni,Sanaa na Michezo Bibi. Suzan Mlawi akipokea Kamusi Kuu ya lugha ya Kiswahili kutoka kwa Katibu Mtendaji  wa Baraza la Kiswahili la Taifa (BAKITA) Dkt.Seleman Sewangi  katika  ofisi ya Baraza hilo leo Jijini Dar es Salaam.

Naibu Katibu Mkuu Wizara ya Habari,Utamaduni,Sanaa na Michezo Bw.Nicholous Willium akipokea Kamusi Kuu ya lugha ya Kiswahili kutoka kwa Katibu Mtendaji  wa Baraza la Kiswahili la Taifa (BAKITA) Dkt.Seleman Sewangi  katika  ofisi ya Baraza hilo leo Jijini Dar es Salaam.

**************************************************************

Na: Shamimu Nyaki-WHUSM

Katibu Mkuu Wizara ya Habari,Utamaduni Sanaa na Michezo Bibi. Suzan Mlawi amefurahishwa na hatua iliyofikiwa na Baraza la Kiswahili la Taifa (BAKITA) la kuandaa Kanzi Data ya Wataalamu wa Lugha ya Kiswahili ikiwa ni kutekeleza agizo la Mhe Waziri  wa Wizara hiyo Dkt.Harrison Mwakyembe alilolitoa kwa Baraza hilo hivi karibuni.

Bibi.Suzan ameyasema hayo leo Jijini Dar es Salaam alipotembelea ofisi za Baraza hilo ambapo amesema kuwa Kanzi Data hiyo itasaidia kuwatambua kwa urahisi watalamu wa lugha ya Kiswahili waliopo hapa nchini ambapo watasaidia kukuza na kuendeleza lugha hii kwa ufasaha ndani na nje ya nchi.

“Serikali ya awamu ya tano ina jitihada kubwa sana kukuza na kuendeleza lugha yetu ya Kiswahili hivyo sisi kama watendaji wa kufanikisha jitihada hizo ni wajibu wetu kuwatambua wataalamu ambao wana uwezo wa kufanikisha adhma ya Serikali”.Alisema Bibi.Suzan.

Kwa upande wake Katibu Mtendaji wa Baraza la Kiswahili la Taifa (BAKITA) Dkt.Seleman Sewangi amesema kuwa Baraza linaendelea kukuza na kuendeleza lugha ya Kiswahili kwa ufasaha kama moja ya majukumu yake ambapo linaendelea na utaratibu wa kuandaa mfumo utakaotawatambua wataalamu wa lugha hiyo ambao wataisadia jamii kuelewa na kutambua Kiswahili kwa ufasaha.

“Kama ilivyo jukumu la Baraza la kukuza na kuendeleza lugha ya Kiswahili tumefanikiwa kuandaa  Kamusi ya Kiswahili ambayo imeanza kutumika na ina maneno ya Kiswahili fasaha ambayo watanzania wanapaswa kujifunza ili wayatumie”.Alisema Dkt. Sewangi.

Kanzi Data ya Wataalamu wa Kiswahili itasaidia wataalamu hao kujulikana ambapo watatakiwa kujisajili kwa gharama nafuu lakini pia itasaidia Serikali kuwatambua na kuona jinsi wanavyoweza kutumia elimu yao kukuza lugha ya Kiswahili ndani na nje ya nchi.