*CCJ CHALI....YASAMBARATIKA RASMI WANACHAMA WAKE WAJIUNGA CHADEMA

Kwa sasa tunaweza kusema Chama Cha Jamii (CCJ) kimekufa rasmi, Kutokana wanachama wake maarufu kujiengua na kujiunga na Chama cha Demokrasia na Maendeleo (CHADEMA).

Baadhi ya walijiengua ni pamoja na Mwenyekiti wa chama hicho, Richard Kiyabo, Msemaji wake Mkuu, Fred Mpendazoe, na Naibu Katibu Mkuu, Dickson Ng’hili, leo walikabidhiwa kadi za Chadema na Mwenyekiti wa Taifa wa chama hicho, Freeman Mbowe.

Hafla hiyo ya kuwapokea viongozi na wanachama hao wapya ilifanyika katika Makao Makuu ya Chadema yaliyopo Kinondoni, jijini Dar es Salaam leo mchana.

Akizungumza na waandishi wa habari, Mpendazoe alisema wameamua kuhamishia mapambano yao katika chama kingine cha siasa baada ya jitihada za kutaka usajili wa kudumu wa Chama chao kipya cha CCJ kugonga mwamba.

Mpendazoe ambaye alikuwa Mbunge wa Kishapu kupitia Chama Cha Mapinduzi (CCM) kabla ya kujiunga CCJ, aliwataka wananchi wote waliokuwa na dhamira ya kuwania uongozi mwaka huu kupitia CCJ kwa sasa wafanye hivyo kwa kupitia CHADEMA.

Kwa msimamo huo, amewataka waliokuwa wanachama wa CCJ wote nchini sasa waelekeze nguvu zao katika Chama cha CHADEMA.

Katika tamko lao, viongozi hao walisema wamejiunga Chadema kwa kuwa itikadi za vyama hivyo zinafanana.

Alimshutumu Msajili wa Vyama vya Siasa, John Tendwa kwa kukwamisha usajili wa CCJ.

Hata hivyo Mpendazoe alionekana kama bado alikuwa na mapenzi na CCJ licha ya kujiunga na chama kipya, akisema ni chama ambacho kilibeba matumanini ya Watanzania, lakini kimekumbana na wimbi la hujuma kutoka Serikali ya CCM.

“Januari 18, mwaka huu sisi wananchi wazalendo tulikutana jijini Dar es Salaam kutimiza haki yetu ya kikatiba, tuliunganisha mawazo na kuunda chama cha siasa.

“CCJ kilizingatia changamoto zote zinazoikabili nchini yetu tangu na baada ya Uhuru na kubeba matarajio ya wananchi wa leo na kesho, kikiwa na lengo kuu la kuleta mageuzi ya kitaifa ya kidemokrasia, kiuchumi, kijamii na kisiasa kwa faida yetu sote na kizazi kijacho,” alisema.

Alisema, “Kutokana na shinikizo la Watanzania, wanasheria na baadhi ya mabalozi, hatimaye Mei 3, mwaka huu Msajili kwa shingo upande aliamua kufanya uhakiki wa wanachama wa CCJ kwa mikoa minne, akianzia Dar es Salaam, Pwani, Morogoro na baadaye Mjini Magharibi.”

Mpendazoe alisema licha ya Msajili kudai kuwa chama hicho hakina wanachama na ofisi, takwimu walizonazo zinaonyesha kuwa chama hicho kina wanachama 9,500.
Viongozi hao walitangaza nia ya kuwania ubunge katika majimbo mbalimbali.

Kiyabo alisema atawania Bukene (Tabora), Mpendazoe atawania Segerea (Dar es Salaam), huku Ng’hili akisema atagombea Temeke; wote kupitia Chadema.

Kwa upande wake, Mbowe aliwapongeza viongozi hao kwa uamuzi huo na kusema ni sawa na kitendo cha mtu kubadili gia chombo kikiwa angani.

“Huu ni uamuzi wa busara, wapo wengi wanakerwa katika vyama vyao, lakini wanashindwa kufikia uamuzi mgumu kama huu. Tunawakaribisha Watanzania wote bila kujali nyadhifa na mahala walipo, waje tuunganishe nguvu kuiondoa CCM,” alisema.

Akizungumzia mchango wa Sh milioni 100 uliotolewa na kada wa CCM, Mustapha Sabodo kwa Chadema, Mbowe alimshukuru kada huyo na kueleza kuwa Sabodo ni mfano wa kuigwa katika safari ya kuimarisha demokrasia nchini.

Pichani ni baadhi ya wanachama wa CCJ, wakiandamana na mabango wakati wa harakati za chama hicho kudai usajili wa kudumu kwa msajili wa Vyama jijini Dar es Salaam hivi karibuni.