Profesa Mwaikusa enzi za uhai wake...
Aliyekuwa Mhadhili wa Chuo Kikuu cha Dar es Salaam, Kitivo cha Sheria, Profesa Jwan Mwaikusa (58), amefariki dunia usiku wa kuamkia leo baada ya kupigwa risasi na watu wasiojulikana nyumbani kwake Salasala jijini Dar es Salaam.
Mwaikasu ni mmoja kati ya watu watatu waliouawa katika tukio hilo linalohusishwa na ujambazi, wengine waliouawa ni mpwa wake, Gwamaka Mwakanjara (25), na jirani John Ngowi, mwenye umri wa miaka zaidi ya 40.
Imeelezwa na mashuhuda wa tukio hilo kuwa wauaji hao hawakuchukua mali yeyote, ingawa mmoja wa watoto wa Profesa Mwaikusa alisema aliwaona wakimpekua baba yake baada ya kumuua.
Washiriki wa mauaji hayo walimwinda Profesa Mwaikusa wakati akiingia kwenye Geti la nyumbani kwake baada ya kufunguliwa lango hiyo na kuingia ndani ya nyumba yake.
Akisimulia tukio hilo, mtoto wa Profesa Mwaikusa, Baraka Mwaikusa (28), alisema wakati baba yake anauawa kwa risasi alikuwa ndani akijiandaa kulala, na kwamba alishuhudia tukio lote baada ya kusikia kishindo na kutoka nje.
“Hili ni tukio baya sana kwangu, kwa sababu baba ameuawa wakati namuona, wakati akiingia hapa nyumbani na gari lake alifunguliwa lango na kijana mmoja jirani yetu, wakati huo mimi nikiwa ndani.
“Nilisikia muungurumo wa gari, nikajua tu kuwa ni mzee anaingia, nikamuona akiendesha gari kuelekea geti la juu ili ageuze gari kama kawaida yake.
“Wakati akigeuza gari, ghafla nilisikia kishindo cha ajabu, nikashtuka kwa sababu sikujua kilikuwa ni kitu gani ila nilihisi ni kitu Fulani kilichokanyagwa na tairi la gari.
“Kumbe kishindo nilichosikia ilikuwa ni risasi ambayo tayari majambazi hao walikuwa wamempiga binamu yetu Gwamaka baada ya kukutana nao getini uso kwa uso na kupishana Kiswahili, huku wao wakimtaka kuinua mikono juu.
“Dakika chache baada ya Gwamaka kuuawa, nikasikia watu wawili wakimwamrisha baba, ‘fungua mlango wa gari, “Nakwambia fungua mlango, fungua haraka ushuke chini.”
“Mzee hakutii amri yao, akaendelea kukaa kwenye gari huku akiwa amefunga vioo,” alisema Baraka.
Kwa mujibu wa Baraka, wakati majambazi hao wakimwamrisha Profesa Mwaikusa kisha kumuua kwa risasi, yeye alikuwa ndani akiwaona kupitia dirishani.
“Baba alipokataa kutii amri yao, nikaona mmoja ananyanyua bunduki akamlenga baba na kumpiga risasi mbili kifuani na kumuua hapo hapo kisha wakamshusha kwenye gari na kuanza kumkanyaga huku wakimpekua mifukoni.
“Nilipoona hivyo, nilichanganyikiwa na kutoka nje, na kuwafuata eneo hilo na kuwauliza kwa nini wamemuua baba?
“Wakaniambia, ‘asingekuwa mbishi tusingemuua’, mmoja wao akatoa bastola, akaniuliza tena, ‘na wewe unataka tukuue kama baba yako’?
“Hapo nikanyamaza, wakanikamata na kuanza kunipiga ngumi na makofi, kisha wakaniambia ‘mikono juu, ondoka hapa, kimbia haraka hatutaki kukuona’.
“Niligeuka nikaondoka taratibu, wakanirushia mawe nami nikaanza kukimbia, kwa kweli wakati huo sikuwa na akili hata moja ya kufikiri lolote nilipoteza kabisa kumbukumbu,” alisema.
Baada ya majambazi hao kumuua Profesa Mwaikusa na mpwa wake, waliondoka nyumbani hapo na kuvamia maduka kadhaa na kupora fedha, vocha za simu na mali nyingine.
Inasemekana wakati wa uvamizi huo, Ngowi alipekuliwa na kukutwa na bastola. Hatua ya kukutwa na bastola ilimfanya mmoja wa wajambazi hao ampige risasi mbili.
Aidha Imeelezwa kuwa Ngowi alifika nyumbani kwake na kuchukua bastola baada ya kupita kwa Profesa Mwaikusa na kuona purukushani zilizokuwa mahala hapo na kuhisi kuwa kunatukio la uvamizi.
Lakini wakati akirudi eneo la tukio ghafla naye alitekwa na kuunganishwa na wengine waliokuwa wamelazwa chini nje ya kiduka na kuanza kupekuliwa huku wengine wakichukuliwa simu zao na fedha na alipopekuliwa yeye alikuwa mbishi na ndipo alipopekuliwa kwa nguvu na kukutwa na Bastola na kasha kupigwa risasi ambapo aliweza kukimbia kutoka eneo hilo akiwa amechanganyikia na kwenda kufia eneo la kanisani
Kaimu Kamanda wa Polisi, Kanda Maalum ya Dar es Salaam, Charles Kenyela, alithibitisha kutokea kwa tukio hilo na kusema Jeshi la Polisi limejipanga vizuri kuhakikisha watu hao wanakamatwa.
Askari Polisi wakipima eneo la tukio mahala alipouawa Profesa nje ya nyumba yake baada ya kuingia ndani ya geti eneo la Salasala Barabara ya Mkonde Jijini Dar es Salaam leo mchana.
Baadhi ya majirani wakijumuika na Familia ya Profesa nyumbani kwa marehemu leo mchana katika msiba huo.
Askari wakiendelea na zoezi la kuchukua kumbukumbu katika eneo hilo.
Majirani wakiwa na Huzuni nyumbani kwa marehemu.
Mke wa marehemu, Lofea Mwaikusa (katikati baada ya huyu aliyenyoosha mkono) akiwa na majirani akilia kwa uchungu.
Watoto wa Familia hiyo akilia......
Askari wakiendelea na zoezi la kuichunguza gari hiyo kwa vifaa maalum.
Askari wakiendelea na zoezi la kuichunguza gari hiyo kwa vifaa maalum.
Mtoto wa kwanza wa Marehemu Mwaikasu, Baraka Mwaikasu (kulia) aliyenusurika kuuawa, akihojiwa na askari Polisi.
Huyu ndiye Binti aliyekuwa akiishi na Mfanyabiara John Ngowi, akiwa ni msaidizi wa kazi za ndani, Husna Siraji, akiwa nje ya nyumba ya marehemu.
Afande akizungumza na wanafamilia wa Ngowi nyumbani kwa mfanyabiasha huyo.
Baadhi ya wakuu wa Polisi wakitoka ndani ya nyumba ya John Ngowi, kuzungumza na wanafamilia na msichana huyo Husna, ambaye imeelezwa ndiye aliyemfungulia geti wakati akiingia ndani kabla ya kutoka kuelekea eneo la Tukio.
Huyu ni mtoto wa pili wa marehemu Mwaikasu, Mussa Mwaikasu (katikati) akiwasiliana kuweka mambo swa.
No comments:
Post a Comment