Dk. Mohamed Gharib Bilal (65), jana alitangazwa rasmi kuwa mgombea mwenza wa Rais Jakaya Kikwete, katika Uchaguzi Mkuu unaotarajiwa kufanyika Oktoba, mwaka huu.
Jina la Dk. Bilal, lilitangazwa na Mwenyekiti wa Chama Cha Mapinduzi (CCM), na mgombea urais kupitia tiketi ya chama hicho, Rais Jakaya Kikwete jana usiku.
Jumla ya wajumbe zaidi ya 1,900 wa Mkutano Mkuu wa chama hicho ulifanyika Kizota, nje kidogo ya Manispaa ya Dodoma, walikuwapo ukumbini humo tuli wakisikiliza kwa makini wakati likitajwa jina hilo.
Baada ya Dk. Bilal kutangaza kuwa hatogombea tena baada ya jina lake kuenguliwa katika mchakato huo na kuwa amekata tama baada ya kusubiri sana. Sasa atakuwa amepunguziwa “maumivu”, baada ya kinyang’anyiro hicho cha kuwania uteuzi wa kukiwakilisha chama hicho kwenye Uchaguzi wa Rais wa Serikali ya Mapinduzi ya Zanzibar.
Katika uchaguzi huo uliofanywa na Halmashauri Kuu ya CCM Julai 9, mwaka huu, Dk. Ali Mohamed Shein, aliibuka mshindi kwa kupata kura 117 dhidi ya kura 54 za Dk. Bilal; na kura 33 alizopata Waziri Kiongozi wa Serikali ya Mapinduzi Zanzibar, Shamsi Vuai Nahodha.
Rais Kikwete alikatiza Mkutano Mkuu kwa muda na kuwaita wajumbe wa Kamati Kuu ya CCM. Waliporejea Rais Kikwete alitoa shukrani za kupitishwa tena kukiwakilisha chama kwenye urais na kisha akatangaza jina la Dk. Bilal.
Awali, Makamu Mwenyekiti wa CCM (Tanzania Visiwani) na Mwenyekiti wa Baraza la Mapinduzi, Rais Amani Abeid Karume, alitangaza matokeo ya kura zilizopigwa kumthibitisha Rais Kikwete, kukiwakilisha chama hicho katika kinyang’anyiro cha Uchaguzi wa Rais baadaye mwaka huu.
Wajumbe wote wa Mkutano Mkuu ni 1,968. Waliopiga kura jana ni wajumbe 1,909. Hakuna kura iliyoharibika. Kura za “hapana” zilikuwa 16. Kura za “ndiyo” zilikuwa 1,893. Idadi hiyo ya kura za “ndiyo” ni sawa na asilimia 99.16 ya kura zote zilizopigwa. Kwa ushindi huo, uteuzi wake ulithibitishwa rasmi.
Aidha, Dk. Shein alipewa muda wa kuzungumza na wajumbe na akaahidi kushirikiana na viongozi na wananchi katika kujenga umoja wa Wazanzibari na Watanzania wote, kwa lengo moja la kuleta maendeleo.
Naye, Rais Karume, alitumia fursa hiyo kuwaaga wajumbe na kushukuru kwa ushirikianoa aliopewa kwa miaka yote 10 iliyomwezesha kutekeleza kwa vitendo Ilani ya Uchaguzi ya CCM.
WASIFU wa DK. MOHAMED GHARIB BILAL
Kuzaliwa
Dk. Mohammed Gharib Bilal alizaliwa Februari 6, 1945 mjini Unguja. Kitaaluma ni ni mwanasayansi wa nyuklia-aliyechukua shahada yake ya kwanza ya fizikia katika Chuo Kikuu cha Howard, Marekani mwaka 1967.
Mwaka 1969 alipata Shahada ya Uzamili ya Fizikia katika Chuo Kikuu cha California, Marekani. Shahada yake ya udaktari wa falsafa katika fani ya fizikia aliipata mwaka 1976 Chuo Kikuu cha Califonia. Amebobea katika masuala ya nyuklia.
Kazi alizofanya
Mwaka 1990-1995 alikuwa Katibu Mkuu Wizara ya Sayansi, Teknolojia na Elimu ya Juu ya Serikali ya Jamhuri ya Muungano ya Tanzania.
Mwaka 1976-1990 alikuwa Mhadhiri Chuo Kikuu cha Dar es Salaam, Idara ya Fizikia.
1982-1988 Mkuu wa Idara ya Fizikia, Chuo Kikuu cha Dar es Salaam.
Alikuwa Mkuu wa Kitivo cha Sayansi cha Chuo Kikuu cha Dar es Salaam. Kipindi hicho hicho, Dk. Bilal alikuwa Mwenyekiti wa Kamati ya Sayansi ya Baraza la Pamoja la Vyuo Vikuu vya Afrika Mashariki. Kipindi hicho pia alikuwa Mjumbe wa Bodi ya Tume ya Sayansi na Teknolojia.
Mwaka 1993-1990 alikuwa Mjumbe Bodi ya Taifa ya Mionzi (National Radiation Commission). Mara baada ya uchaguzi wa mwaka 1995, wakati wa utawala wa Dk. Salmin Amour, alimchagua Dk. Bilal kuwa Waziri Kiongozi. Na katika uchaguzi wa mwaka 2000 uliomweka Amani Karume madarakani, Dk. Bilal aliingia katika kinyang’anyiro cha kura za maoni za ndani ya CCM na kupata kura nyingi.
Ingawa Kamati Kuu Maalum ya Zanzibar ilimpa alama A, lakini majina yalipofikishwa Dodoma kwenye Kamati Kuu lilipitishwa jina la Amani Abeid Karume.
Mwaka 2005, Dk. Bilal aliamua kugombea tena, lakini Kamati Kuu ya CCM ikamuomba kuondoa jina lake kabla ya kufikishwa kwenye kikao cha Halmashauri Kuu kwa ajili ya kupigiwa kura.
Mwaka huu, Dk Bilal amejitosa kwa mara ya tatu na safari hii akikwaana na kizingiti kingine, Dk. Ali Mohamed Shein.
Wakati akitangaza nia ya kuiwakilisha CCM katika uchaguzi wa Rais wa Zanzibar, alisema ataimarisha Muungano baina ya Tanganyika na Zanzibar.
“Muungano wetu ni imara pamoja na kuwepo kwa matatizo mbali mbali jambo la msingi ni kuyapatia ufumbuzi wake matatizo hayo kwa njia za kistaarabu.”
Mwenyekiti wa CCM na Rais Jakaya Kikwete (kulia) akiteta jambo na Waziri Mkuu Mizengo Pinda, wakati wa mkutano huo.....
No comments:
Post a Comment