*MAPACHA WATATU KUPAMBA UZINDUZI WA FILAMU YA SHOGA

Na Sufianimafoto Reporter, jijini
WASANII watatu maarufu wanaounda kundi la bendi ya Mapacha watatu, Khalid Chokoraa pichani (kushoto), Jose Mara (katikati) na Kalala Junior, wanatarajia kusindikiza ama kupamba uzinduzi wa Filam mpya ya Shoga inayotarajia kuzinduliwa Februari 4 mwaka huu kwenye Ukumbi wa Travertine Magomeni jijini Dar es Salaam.
Wakizungumza na Sufianimafoto wakati wakiwa katika hekaheka za maandalizi ya uzinduzi huo, wasanii hao walisema kuwa onyesho la uzinduzi huo wa Filam, pia litakuwa ni maalum kwa kufanya utambulisho wa nyimbo zao nne mpya zinazotarajia kuwa katika albam yao ya pili ijayo.

Aidha walizitaja nyimbo hizo kuwa ni pamoja na Wajasiliamali na Sumu ya Mapenzi Remix, zilizotungwa na Khalid Chokoraa, Mtoto wa Paka uliotungwa na Kalala Junior na Usia wa Baba, uliotungwa na Jose Mara, ambazo zote zitapatikana kwenye albam yao ya pili inayotarajia kukamilika hivi karibuni.
Pia aliwataja wasanii walioshiriki kwenye Filam hiyo kuwa ni pamoja na Tino, ambaye ndiye mtunzi wa filam hiyo, Aunt Ezekiel, Jacline Wolper, Otilia Joseph, Charls Magari, Kulwa Kikumba (Dude) Julieth Samson (kemmy) na Chemundugwao.
Shoo nyingine zitakazosindikiza uzinduzi huo ni pamoja na Onyesho la Khanga moja kutoka kwa Wanadada wa Ilala, Kinondoni na Temeke, watakaochuana katika kuonyesha namna ya uvaaji wa Khanga moja.
Bendi hiyo ya Mapacha Watatu, inafanya maonyesho yake kila siku za Jumanne na Jumapili, ambapo siku ya Jumanne hufanya onyesho lao kwenye Ukumbi wa Coco Beach kuanzia saa 3 usiku na siku ya Jumapili hufanya onyesho kwenye Ukumbi wa Mzalendo Pub, uliopo Millenium Tower Makumbusho, kuanzia saa 1 jioni.

Kava la Filamu hiyo.