Mkurugenzi wa bendi ya Extra Bongo Kamalade Ally Choki amesema, tayari wamemchukua mwanamuziki machachari na mtunzi mahili Ramadhan Masanja, au Banza Stone kama wanavyomuita mashabiki wake.
Ali Choki ameyasema hayo wakati alipoongea leo mchana kwa njia ya simu, akiwa pamoja na mwanamuziki Banza Stone jijini Dar es salaam.
Choki amesema kwamba kutokana na uwezo wa Banza Bendi ya Extra Bongo imeona ni muhimu kumuongeza kwenye safu ya uimbaji na utunzi ili kuongeza mashambulizi zaidi, kwani pia mwanamuziki huyo ni mzoefu na mwenye uwezo mkubwa wa kutunga nyimbo.
Naye Banza Stone amethibitisha kufanya mazungumzo na Mkurugenzi wa bendi hiyo, Ally Choki na kwamba tayari kila kitu kiko sawa, na punde ataanza kuonyesha makeke yake katika ukumbi wa Mzalendo Pub katika onyesho la kesho.
Ameongeza kwamba siku ya ijumaa atafanya mambo pamoja na Extra Bongo kwenye ukumbi wa Meeda aliopo Sinza jijini Dar es salaam, na kwa sasa anatengeneza nyimbo kali kwa ajili ya kujitambulisha kwa mara ya kwanza katika jukwaa la bendi hiyo.
"Watu wategemee mambo mazuri kutoka kwangu kama ilivyo kawaida yangu siku zote sibahatishi katika anga za muziki wa dansi". alisema Banza
No comments:
Post a Comment