*MAKAMU WA RAIS DKT BILAL ATEMBELEA NA KUKAGUA MRADI WA KILIMO CHA ZABIBU DODOMA LEO

Makamu wa rais wa Jamhuri ya Muungano wa Tanzania, Dkt. Mohammed Gharib Bilal, akikagua moja ya bomba linalopitisha maji kwenda katika miche ya mizabibu  wakati walipowasili Kijiji  cha Chilangali (ii) Wilaya ya Chamwino Mkoa wa Dodoma leo, kukagua mradi wa kilimo cha Zabibu (FUNE) katika shamba hilo lenye ukubwa wa Hekari 300. Kulia ni mmoja kati ya wakulima wa mashamba hayo, Gulavile Chikamanjenzi, akimpa maelezo.

 

 

Makamu wa Rais wa Jamhuri ya Muungano wa Tanzania, Dkt. Mohammed Gharib Bilal na mkewe, Mama Asha Bilal, wakitoka kukagua mashamba ya zabibu, wakati walipowasili Kijiji  cha Chilangali (ii) Wilaya ya Chamwino Mkoa wa Dodoma leo, kukagua mradi wa kilimo cha Zabibu (FUNE) katika shamba hilo lenye ukubwa wa hekari 300.

Makamu wa Rais wa Jamhuri ya Muungano wa Tanzania,  Dkt. Mohammed Gharib Bilal na mkewe Mama Asha Bilal, wakikagua miche ya mizabibu.

Makamu wa Rais wa Jamhuri ya Muungano wa Tanzania, Dkt. Mohammed Gharib Bilal na mkewe Mama Asha Bilal, wakisikiliza maelezo kutoka kwa mwendeshaji wa mitambo ya kusukumia maji kwenda katika mashamba ya Zabibu, Aloyce Zakaria.

Makamu wa Rais wa Jamhuri ya Muungano wa Tanzania, Dkt. Mohammed Gharib Bilal na mkewe, Mama Asha Bilal, wakiangalia Bwawa la kuhifadhia maji ya kumwagilia mashamba ya Zabibu, wakati walipowasili Kijiji  cha Chilangali (ii) Wilaya ya Chamwino Mkoa wa Dodoma leo Agosti 02, 2011 kukagua mradi wa kilimo cha Zabibu (FUNE).

Makamu wa Rais wa Jamhuri ya Muungano wa Tanzania, Dkt. Mohammed Gharib Bilal, akiwahutubia wakulima wa Zabibu baada ya kutembelea na kukagua mashamba, wakati alipowasili Kijiji  cha Chilangali (ii). 

 *******************************************

Makamu wa Rais Dkt. Mohammed Gharib Bilal amewataka wananchi kujenga utamaduni wa kutumia taasisi za fedha za ndani kwa ajili ya kuinua uchumi wao badala ya kungoja ruzuku kutoka nje.

Dkt. Bilal ameyasema hayo leo wakati alipokuwa akizungumza na wananchi baada ya kukagua shamba la zabibu lililoko katika kijiji cha Chinanganali II, Kata ya Bwigiri katika wilaya ya Chamwino mkoani Dodoma.

Alisema wananchi wanapaswa kujenga imani kuwa taasisi za fedha nchini zikiwemo benki za CRDB na NMB zina uwezo mkubwa wa kusaidia wananchi kuondokana na umaskini kutokana na mikopo inayotolewa na taasisi hizo.

“Tutumie taasisi zetu za ndani kuinua uchumi, sio kuwa tegemezi kuongoja ruzuku kutoka nje. Dodoma tuna mifano mingi, Chuo Kikuu cha Dodoma (UDOM) kimejengwa kwa taasisi za ndani kwa asilimia 100,” alisema Dkt. Bilal.

Akizungumzia hali ya kisiasa nchini na hasa sasa ambapo kumeibuka majibizano ya kiitikadi katika Bunge, Makamu wa Rais alisema, hiki ni kipindi muhimu kwa wananchi wa Tanzania kushikamana na kuwa wamoja zaidi na pia akawataka wananchi wa Chinangali II kuendelea kujenga Taifa lenye upendo na amani na kusisitiza kuwa ni sera nzuri zilizopo ndizo zitakazowapeleka kwenye maendeleo na wala sio maandamano.

Awali, akitoa taarifa, Mkuu wa wilaya ya Chamwino Lephy Gembe alimweleza Makamu wa Rais kuwa Benki ya CRDB imetoa mkopo wa jumla ya shilingi bilioni 1.5 kwa ajili ya kuwawezesha wakulima kugharamia shamba hilo la zabibu la ekari 300.

Alisema mradi huo wa kilimo cha zabibu utawanufaisha wanachama wapatao 300 kutoka vijiji vya Buigiri, Chamwino, Manchali, Makoja, Mlebe na Chanangali II ambao kwa kutumia umwagiliaji wa matone watavuna wastani wa tani 10-15 kwa ekari kwa mwaka na kuweza kujipatia shilingi milioni 10 -15 kwa mwaka kwa bei ya sasa ya shilingi 1,000 kwa kilo ya zabibu.

Mkuu huyo wa Wilaya alisema kipato hicho kitawawezesha wakulima kurejesha gharama za mradi katika kipindi cha miaka miwili na pia wakulima watakuwa na kipato cha uhakika ambacho watakitumia kutatua matatizo ya upungufu wa chakula, kujijengea makazi bora na hivyo kupunguza umaskini.

Imetolewa na Ofisi ya Makamu wa Rais

Safarini Dodoma