*TAFF YATOA TAMKO KUHUSU MAHARAMIA WA KAZI ZA WASANII

Mwenyekiti wa Bongo movie, Jacob Stevin 'JB' (kushoto) akizungumza na waandishi wa habari Dar es salaam leo juu ya wizi mkubwa uliotokea hivi karibuni wa wizi wa kazi za wasanii uliofanywa na moja ya Kampuni ya kusambaza kazi za wasanii. Picha na Super D

*******************************

 SHIRIKISHO la Filamu nchini(TAFF) kwa kushirikiana na Mamlaka ya Mapato Tanzania (TRA) pamoja na Kampuni za usambazaji wa filamu na kazi za wasanii ‘zimeapa’ kupambana na maharamia wote wa kazi hizo ili kulinda maslahi ya wasanii, kote nchini.

Wakizungumza katika mkutano na waandishi wa habari Jijini Dar es salaam leo, umoja huo kwa pamoja ulisema umefika wakati sasa tatizo la wizi wa kazi za wasanii lishughulikiwe kikamilifu ili kuzima mianya yote ambayo ni kero kwa wasanii kwa muda mrefu.

Rais wa Shirikisho hilo Simon Mwakifwamba, mbali na mikakati hiyo pia aliiomba Serikali kutekeleza ahadi yake ya kuwasaidia wasanii kwa kupambana na maharamia hao aliodai kuwa wapo kila pembe ya nchi hii huku wakijiamini kwa kuendelea na kazi hiyo.

“Umefika wakati kwa Serikali kusikia kilio hiki cha wasanii na kuweka mbinu kali zitakazosaidia kuokoa maisha ya wasanii wanaoendelea kuwa masikini kila kukicha kutokana na uwepo wa watu wachache wanaoiba kazi zao,

“Tuna imani kuwa kama kazi za wasanii zitasimamiwa vizuri, tutaweza kuongeza pato la Taifa kwa kiwango kikubwa ikizingatiwa kuwa sanaa hii kwa sasa hapa nchini imeonyesha mafanikio isipokuwa kuna watu wachache ndiyo wanaonufaika nayo” alisema Mwakifwamba.

Naye Mwenyekiti wa Bongomuvi, Jacobo Steven ‘JB’ alisema sanaa inaweza kuwa na nafasi ya tatu kwa kuchangia pato la Taifa ukiacha pato linalochangiwa na sekta za madini maliasili pamoja na utalii.

Alisema Serikali inapswa kuonyesha makali yake kwa kuwakamata wahusika wote wa wizi wa kazi hizo ili kuendeleza nguvu za wasanii wa hapa nchini walioamua kujitoa mhanga kufanya kazi zao.

Kwa upande wake Meneja usimamizi kutoka TRA Msafiri Ndimbo, alisema Mamlaka hiyo imejipanga kudhibiti wizi wa kazi hizo kuanzia Januari Mwakani hasa baada ya Serikali kupitia Bunge lake kukubalina kuweka mikakati ya kupamba na suala hilo. 

Ambapo wasanii na wasambazaji wa kazi zao wameungana pamoja kwa ajili ya kuhakikisha kazi zao zinakwenda kwa haki ili wasanii nao waweze kupata nguvu ya kusaidi wasanii wenzao kusambaza kazi zao.