*KABANGE TWITE KUSUBIRI MSIMU UJAO YANGA

Jitihada za kukamilisha taratibu za kumuwezesha mchezaji Alain Kabange Twite, kuichezea timu ya Yanga katika Ligi Kuu ya Vodacom Tanzania Bara msimu huu (2012/2013) zimeshindikana baada ya klabu hiyo kuingiza nyaraka zenye upungufu wakati ikimuombea Hati ya Uhamisho wa Kimataifa (ITC) kwa njia ya mtandao (Transfer Matching System- TMS).

Kwa mujibu wa Shirikisho la Kimataifa la Mpira wa Miguu (FIFA), baadhi ya nyaraka zenye upungufu katika maombi hayo ni mkataba kati ya Twite na Yanga, lakini vile vile makubaliano ya mkopo (Loan Agreement) kati ya Yanga na FC Lupopo ya Jamhuri ya Kidemokrasi ya Congo (DRC) ambayo ndiyo inayommiliki mchezaji huyo.

Ili mchezaji huyo aweze kupata ITC kwa njia ya TMS, kwa mujibu wa Kanuni za Uhamisho wa Wachezaji za TFF kuna nyaraka kadhaa muhimu zinatakiwa kukamilika katika maombi hayo ili hati hiyo iweze kupatikana.

Kwa maana hiyo basi mchezaji huyo kwa sasa hataweza kukipiga katika msimu huu wa ligi na badaya yake itamlazimu kusubiri msimu ujao baada ya taratibu hizo kukamilika.