Na Mwandishi wetu
TIMU ya Mwananchi Football Club kesho (Jumapili) itapambana na timu ya Mikovilla Veterans katika mchezo wa kirafiki uliopangwa kufanyika kwenye uwanja wa Kijitonyama.
Mechi hiyo imepangwa kuanza saa 1.30 asubuhi na maandalizi yake yamekwisha kamilika kwa mujibu wa nahodha wa timu hiyo, Majuto “Ronaldo De Lima” Omary.
Majuto alisema kuwa mchezo huo ni moja ya maandalizi kwa ajili ya michuano ya NSSF iliyopangwa kuanza mwishoni mwa mwezi ujao jijini. Alisema mbali ya maandalizi ya NSSF, mchezo huo pia ni wa kukaribisha mwaka 2013.
Alisema kuwa wachezaji wote wapo katika hali nzuri na mchezo huo utakuwa kipimo chao cha kwanza mwaka huu. “Hatujacheza mechi tangu tushinde mashindano ya Corporate Bonanza yaliyofanyika uwanja wa chuo kikuu, ni kipmo kizuri kwa wachezaji wangu kabla ya kuanza rasmi mazoezi kwa ajili mechi mbali mbali na mashindano ya NSSF,” alisema Majuto.
Alifafanua kuwa kikosi chake kinatarajiwa kuwa na wachezaji wapya ambao watakuwa wanacheza kwa mara ya kwanza katika timu yao. Alisema kuwa wachezaji hao wamejiunga na kampuni yao hivi karibuni.
Kuhusiana na Mikovilla, Majuto alisema kuwa ni timu nzuri na bila shaka itakuwa kipimo cha kikubwa kwao hasa kwa kipindi hiki cha mwanzo wa mwaka. “Tunajua ni kipindi kigumu kwa mambo mengi, wachezaji wengi walikuwa likizo na wengi walikuwa mikoani, ila wametuhakilishia kuwa hawawezi kupoteza mchezo huo,” alisema.
No comments:
Post a Comment