*JEZI MPYA ZA MACRON SASA NI RASMI KUTUMIKA YANGA, CAF YAIBANIA BIA YA KILIMANJARO

Na Zainab Nyamka, Dar

BAADA ya kutokutumia jezi zenye mdhamini wao bia ya Kilimanjaro, Shirikisho la Mpira wa Miguu (TFF) limetolea ufafanuzi kuhusiana na suala hilo kwani kutokana na kanuni za michuano ya Shirikisho la Soka Afrika (CAF) kuwa timu yoyote inapoingia kwenye hatua ya makundi (nane bora) haki za udhamini za timu zote zinahamia kwa shirikisho hilo kwa hiyo wadhamini wote wanatakiwa kuingia makubaliano na CAF na si klabu tena.

Akizungumza na waandishi wa habari Afisa habari wa TFF, Alfred Lucas amefafanua hayo mapema leo na kusema kuwa, Yanga hawakuhudhuria vikao vya awali vya timu zilizoingia kwenye hatua ya makundi kama walivyotakiwa na ndiyo maana hawakulifahamu hilo ila kwa sasa kama mdhamini atataka aendelee kuweka nembo atatakiwa kukaa chini na CAF na kukubaliana. 

“Timu yeyote ikifika hatua ya makundi haki za udhamini zote zinahamia kwa CAF, na zaidi  Yanga wanaweza kuendelea kutumia jezi zao mpya kama Bia ya Kilimanjaro hawatataka kuweka nembo yao tena.”

Kwa upande wa klabu ya Yanga, Mkuu wa kitengo cha Haabari na Mawasiliano Jerry Muro amesema kuwa mkataba wao na Bia ya Kilimanjaro unaelekea ukingoni na kusema kuwa ni uamuzi wao kutaka kuendelea nao au kuangalia uwezekano wa kupata kampuni nyingine itakayokuwa na maslahi zaidi na itakayoinufaisha klabu yao. 

Aidha alisema kuwa wakati wanaenda nchini Algeria hawakuwa wakifahamu kuwa kama kuna mabadiliko ya jezi kwani hawakuhudhuria kikao cha awali cha timu zilizoingia kwenye hatua ya makundi.

”Kutokana na kutojua mabadiliko ya kanuni za CAF kuwa haki za udhamini zinahamia kwao na Klabu yeyote haitaruhusiwa kutumia nembo ya mdhamini mpaka watakapokubaliana nao, hata hivyo udhamini wetu na Bia ya Kilimanjaro, unamalizika hivi karibuni hivyo tutaangalia kampuni itakayohitaji kushiriki nasi na maslahi zaidi, 

Mpaka sasa yameshajitokeza makampuni mengi, ila bado wapo kwenye mazungumzo na masuala yote yakikamilika basi tutawataarifu mashabiki na wanachama wa Yanga kuhusiana na ujio mpya wa mdhamini'' alisema Muro.

Yanga kwa sasa wataendelea kutumia jezi hizo kwenye michuano ya Kombe la Shirikisho na kuna uwezekano  wa kuzitumia mpaka kwenye ligi kuu msimu ujao. Kampuni hiyo ya Macron iliyopo nchini Italia inayotengeneza jezi hizo, imeingia mkataba na Yanga wa kuwavalisha kuanzia sasa huku ikiwa tayari inawavalisha mabingwa wa kihistoria Afrika Zamaleck ya nchini Misri.

Muro amesema, wanataka kuwa tofauti na wengine kuanzia mavazi hado utofauti wa kuendesha timu yao kwani hadi sasa wao ndiyo wawakilishi pekee wa Afrika Mashariki na Kati na wanataka kuhakikisha wanafika mbali zaidi na kuweka historia nchini. Ukiachilia mbali hilo amewataka mashabiki wa Yanga kuendelea kuisapoti timu yao kuelekea mchezo wao wa pili dhidi ya Tp Mazembe utakaopigwa Juni 28 Jijini Dar es salaam.