*RUVU SHOOTING YAJIPANGA KUFANYA KAMA ‘LEICESTER CITY’ YAANZA KUJIFUA KABLA YA MSIMU KUELEKEA MSIMU MPYA WA LIGI KUU, KUSAJILI WAPYA SABA TU

Na Zainab Nyamka, Dar

BAADA ya msimu wa ligi Kuu Bara kumalizika hadi sasa bado baadhi ya timu zipo katika mapumziko na nyingi zikiwa bado katika mchakato wa usajili.

Lakini hili ni tofauti kwa upande wa timu ya Ruvu Shooting ambao wamerejea tena Ligi Kuu msimu ujao baada ya kupanda huku wakiongoza katika Kundi B.

Ruvu Shooting wao licha ya kuwa ni mwezi mtukufu, wao tayari wameingia Kambini na tayari wameanza kujifua kwa kasi kuelekea msimu ujao wa Ligi Kuu Tanzania Bara .

Akizungumza na mtandao huu, Mafoto Blog, Afisa habari wa timu hiyo, Masau Bwire amesema kuwa timu yao  tayari imeingia Kambini na imeanza mazoezi licha ya kuendelea kwa mwezi mtukufu wa ramadhani, na kusema kuwa msimu ujao ni muhimu sana kwao kwani wanataka kudhihirisha kuwa walifanyiwa hujuma za kushushwa daraja msimu wa 2014/15.

Masau alisema kuwa timu yao bado inakikosi bora ndio maana wamefanikiwa kurudi Ligi kuu wakiwa na alama ambazo hazikuweza kufikiwa na timu yeyote ndani ya kundi lao.

"Tunataka kuwashangaza mashabiki wa soka nchini na tumejipanga kuchukua Ubingwa msimu uajao kama walivyofanya, Leicester City, Tunajua kuwa mfungo wa mwezi mtukufu wa ramadhani ni ibada muhimu lakini pia haiwazuii wachezaji kufanya mazoezi au kazi nyingine ambazo ni muhimu kwao", amesema Masau.

Aidha amesema kuwa kuelekea msimu ujao wa ligi kuu mwalimu wa timu hiyo, Tom Olaba anataka kufanya mabadiliko ya kikosi chake kwa kukiongezea nguvu katika baadhi ya maeneo kwani mapendekezo yake  ni kuongeza wachezaji saba wa nafasi mbalimbali na alishapeleka suala hilo kwa uongozi.

Masau amesema kuwa timu hiyo itafanya usajili kutokana na mapendekezo ya mwalimu huyo ambayo yataungwa mkono kwa asilimia mia moja.