*WAAMUZI WA YANGA v/s TP MAZEMBE MCHEZO WA JUNI 28 WATAJWA

Na Zainab Nyamka,Globu ya Jamii

 SHIRIKISHO la Mpira wa Miguu Afrika (CAF) limetoa ratiba ya waamuzi watakaocheza mechi ya Yanga dhidi ya TP Mazembe, mechi itakayopigwa Juni 28 katika dimba la uwanja wa Taifa, jijini Dar es Salaam.

Mchezo huo utachezeshwa na mwamuzi kutoka nchini Zambia John Sikazwe akisaidiwa na Jersom Emiliano Dos Santos kutoka Angola pamoja na Berhe O' Michael wa Eritrea huku mwamuzi wa akiba akiwa Wellington Kaoma kutoka Zambia. 

Kamisaa wa mchezo huo atakuwa ni Celestine Ntagungira kutoka Rwanda.

Yanga itavaana na Mazembe huku ikiwa imetoka kupoteza mchezo wake wa awali dhidi ya Mouloudia Olympique Bejaia ya Algeria kwa kukubali kichapo cha goli 1-0. 

Katika mchezo huo Yanga walitengeneza nafasi kadhaa lakini walishindwa kuzitumia ipasavyo na kupelekea kupoteza mchezo huo wa awali.

Aidha ushindi huo unaifanya MO Bejaia kushika nafasi ya pili katika kundi A nyumba ya Mabingwa wa Afrika TP Mazembe huku Yanga ikishika nafasi ya tatu.

Mchezo unaoikutanisha miamba hiyo ya soka unatarajiwa kuwa mgumu kutokana na Yanga kuhitaji ushindi katika mchezo wake wa kwanza nyumbani katika mashindano hayo.   Kwa sasa Yanga wamerejea kambini nchini Uturuki kwa ajili ya maandalizi dhidi ya mazembe huku wakitarajiwa kutua nchini siku mbili kabla ya mchezo wao.