*HOSPITALI YA MWANANYAMALA KAZI NA UTU KWANZA MADAI BAADAE

Waziri Mkuu Mizengo Pinda.

NA MAGRETH   KINABO- MAELEZO

HOSPITALI  ya Mwananyamala iliyopo  jijini Dares Salaam inaendelea kutoa huduma za matibabu ya afya kwa wagonjwa  licha ya Chama cha Madaktari   Tanzania (MAT)  kutangaza kuanza   kwa mgomo  katika hospitali za serikali.

 Waandishi wa Idara ya  Habari ( Maelezo) walitembelea hospitalini hapo na kushuhudia huduma zikiendelea kama kawaida, ambapo waliona  madaktari na manesi wakitoa huduma kwa wagonjwa.

 Akizungumza na waandishi wa habari  kuhusu utoaji wa  huduma, Katibu wa Afya  wa hospitali hiyo, Edwin Bisakala  alisema hali  ni shwari.

“ Sisi  hapa  watumishi  hawajagoma wanaendelea na kazi vizuri isipokuwa  baadhi ya madaktari walio katika mafunzo ya vitendo.

Hapa madaktari walio katika mafunzo ya vitendo wapo 52 lakini walioripoti katika orodha ya daftari kuwa wako kazini  leo ni 21, hata hivyo kutoripoti kwa baadhi yao hakuna   madhara katika utendaji kazi,” alisema  Bisakala.

Alifafanua kuwa wapo wengine 10 ambao ni kitengo cha macho na huduma za dawa ambao hawaripoti kwao ingawa wanafika kufanya mafunzo ya vitendo.

Aliongeza kuwa hata katika mgomo wa awali waliogoma walikuwa ni madaktari walio katika mafunzo ya vitendo.

Bisakala,  alisema kuwa anashangazwa na kitendo cha baadhi ya madaktari walioko katika mafunzo ya vitendo kutoripoti wakati juzi na jana wamelipwa fedha zao kama kawaida.

Akizungumzia kuhusu mgomo huo alisema kuwa ni vizuri (sisi viongozi tukisikia matatizo tushukuru kwa kuyafahamu na kuyashughulikia  na kutoa maamuzi haraka  hata kwa kutoa madaraka kwa wengine (deligate power).

Alishauri kuwa serikali ifanye haraka ili kuweza kutangaza   waraka  wa posho ambao utaonyesha posho za zamani na mpya kwa  watumishi wa  sekta zote.

Waandishi hao pia walitembelea Hospitali ya Taifa ya Muhimbili (MNH) na Kitengo cha Taasisi ya Mifupa (MOI)  ambapo  asubuhi huduma zilikuwa zikiendelea kama kawaida.

Kwa upande wa hospitali ya Temeke  waandishi  walioshuhudia  baadhi ya ndugu wa wagonjwa na wagonjwa wakiwa nje  wakiwa  wamesimama  na wengine wamekata tamaa baada ya kutangazwa kwa mgomo huo majira ya mchana.

Na katika Hospitali ya KCMC mjini Moshi, Madaktari na Wauguzi, wao wamedai kuwa hawatagoma wala kuhusika na mgomo huo ulioitishwa na Chama cha Madaktari, kutokana na wao kuwa waelewa zaidi na kuiacha Serikali ijipange kutangaza mfumo mpya wa Posho.

''Kwani hata tukigoma tutaua watu bure ambao hawana hatia wakati tunaelewa wazi kuwa mwaka wa kifedha umeshapita na Serikali imeshatangaza kujipanga katika msimu ujao wa kifedha ili kurekebisha malalamiko yetu, sasa tunagoma tunamgomea nani''?, alihoji mmoja wa madaktari wa hospitali hiyo.