*MASAWE MTATA KUACHIA PINI JIPYA JUMANNE, AAHIDI KUWASHIKA MARAPA WA BENDI KONGWE ZA BONGO

 

MSAII wa vichekesho kutoka kundi la Ze Comedy linalorusha michezo yake kupitia Kituo cha Televisheni cha Chanel 5, Rojaz Richard A.K.A Masawe Mtata, anatarajia kuachia wimbo wake mpya unaokwenda kwa jina la Binadamu Hotomuweza.

Akizungumza na Mtandao huu wa www.sufianimafoto.blogspot.com, Masawe alisema kuwa Wimbo huo aliowashirikisha wapiga vyombo, Allan Kissa Mundele wa Bendi ya Mapacha wa 3, aliyeungurumisha Gitaa la Solo na Ex Bass wa bendi ya Shengena, aliyepiga gitaa la Besi, ameurekodia katika Studio ya Magic Star iliyopo mitaa ya Sinza jijini Dar es Salaaam.

Aidha alisema kuwa Mixing ya wimbo huo imefanywa na Producer Adda.

Akizungumzia maudhui ya wimbo wake huo, Masawe alisema kuwa ameamua kutoka na wimbo huo ulio katika radha tofauti huku akitumia staili yake inayokwenda kwa jina la Bongo Tekno, huku akiimba kuongea Komedian na kurap, ikiwa ni safari yake ya kuandaa albam yake itakayokuwa na jumla ya nyimbo nane.

Kwa sasa msanii huyo tayari amekwishaachia Video yake ya Nipe Kidogo nichangamshe damu inayoonyeshwa katika vituo mbalimbali vya Televisheni, iliyorekodiwa katika Studio za Edis, ambayo amemshirikisha Rapa mahiri Sauti ya Radi wa Bendi ya Mashujaa.

Masawe alisema kuwa anatarajia kuanza kuusambaza wimbo wake huo mpya katika vituo mbalimbali vya Redio, wiki ijayo, huku akiwataka wafadhili kujitokeza kumsaidia ili aweze kufikia malengo yake ya kuendeleza kipaji chake kupitia Sanaa ama fani yake ya kuimba na kuchekesha.

''Kwa kweli najiamini ninauwezo wa kuimba na kurap na kuwakimbiza wakina Chitokololo, na nawaambia wakae makini kwani ujio wangu si wa spidi ya kawaida kwani pini hili nililomaliza kurekodi nakwambia watakimbia wenyewe kabla ya kukimbizwa.

Na hakuna rapa yeyote wa bendi atakayechana kama nilivyochana mimi, kwani hii itakuwa ni staili yangu tu hawezi rapa yeyote kufanya nilivyofanya mimi, nawataka mashabiki wangu wajue kipaji cha mtu ni kipaji tu na mimi si mkali katika vichekesho pekee bali wasubiri kunipokea katika staili yangu mpya na watanikubali tu''. Alisema Masawe.

Akizungumzia fani yake ya Vichekesho Masawe, alisema kuwa bado anaendelea na kundi lake katika fani yake ya Komedi huku akiendelea kufanya kazi zake binafsi nje ya kundi ili kujiongezea kipato ili aweze kufikia hadhi ya msanii kama walivyo wengine.