*PAPY DOLFINA ATUA BONGO KUREKODI ZING ZONG NA KALALA JUNIOR

KALALA JUNIOR KUJIUNGA TWANGA?

Mwanamuziki mahiri aliyewahi kutamba na bendi ya Nina Musica, Papy Dolfina (pichani kushoto) akipozi kwa picha na Kalala Junior. 

Mwanamuziki huyo ambaye alitimkia Muscut kwa shughuli zake za kimuziki sasa amerejea nchini ambapo tayari amekwishaanza mazoezi ya nyimbo mbili na Kalala Junior, ambazo watarekodi pamoja na kukamilisha albam nzima ya Zing Zong itakayokuwa na jumla ya nyimbo Nane. 

Hata hivyo wakati Kalala akiwa katika mazoezi ya kujiandaa kurekodi Zing Zong hiyo, imeelezwa kuwa huenda akajiunga na bendi ya Twanga Pepeta, ambapo amekuwa akionekana mara kadhaa katika mazoezi ya bendi hiyo yanayofanyika katika Ukumbi wa Mango Garden.

 Kalala alipoulizwa kuhusiana na kujiunga na Twanga, alisema kuwa hakuna haja ya kuwa na haraka ya kujua mambo, ila pindi yatakapokamilika basi ataweka wazi na kila mtu atajua kinachoendelea. 

''Hakuna haja ya kuharakisha kujua mambo, mhusika ni mimi kwa hiyo mambo yatakapokamilika iwapo nitajiunga na bendi yeyote iwe, Twanga ama nyinginezo basi nitaweka wazi''. alisema Kalala, ambaye siku za hivi karibuni alijiengua katika kundi la Mapacha wa3 na kuacha kundi hilo likibaki na Mapacha wa2, yaani Khalid Chokoraa na Jose Mara.