Na Anitha Jonas – MAELEZO, Dar es Salaam.
Serikali imewasihi watanzania kutumia huduma ya mafunzo kwa njia ya mtandao kwani inapunguza gharama na kurahisisha upatikanaji wa majibu ya haraka.
Hayo yalisemwa na Mkurugenzi Mtendaji,Wakala wa Mafunzo kwa Njia ya Mtandao(TaGLaA) Bw.Charles Senkondo alipokuwa akizungumza na waandishi wa habari leo jijini Dar es Salaam kuhusu mafanikio ya taasisi hiyo pamoja na kuanzishwa kwa maktaba ya kisasa za maendeleo ikishirikiana na wadau mbali mbali ndani na nje ya nchi.
“Wakala imefanikiwa kushirikiana na Ofisi ya Menejimenti ya Utumishi wa Umma kwa kutumia mitandao ya kiteknolojia na imeweza kufundisha mfumo wa malipo ya mishahara kwa watumishi wa serikalini watendaji wakuu kutoka taasisi za serikali, wakurugenzi wa halmashauri za wilaya pamoja na wakurugenzi wa rasilimali watu wapatao 1,200,”alisema Bw.Senkondo.
Hata hivyo Bw.Senkondo alisema gharama za kutumia huduma hizi za mafunzo ya mtandao kupitia video ni shillingi 400,000/= kwa saa moja na mikutano hii inaweza kufanyika hata kwa kuwaunganisha watu wa mikoani moja kwa moja na nchi za kimataifa.
Mkurugenzi huyo aliendelea kusema wakala imefanikiwa kuendesha kesi za mahakama kwa kutumia huduma ya mahojiano ya video kwa watu kuweza kutoa ushahidi kwa njia ya video na kusaidia kupunguza gharama pamoja na huhamasiha maamuzi.
Aidha Mkurugenzi Mtendaji huyo alieleza changamoto mbalimbali zinazoikumba taasisi hiyo ikiwemo ufinyu wa nafasi za ofisi na kufafanua kuwa kuna jitihada za kupata eneo la kujenga ofisi zitakazo kidhi mahitaji ya wakala.
Jumla ya washiriki 20,322 wamepata mafunzo kutokana na midahalo iliyofanyika pamoja na mafunzo 783 ya kubadilishana maarifa yaliyoendeshwa kupitia wakala katika kipindi cha mwaka 2005 mpaka 2015.
No comments:
Post a Comment