*YANGA YAWAFANYIA KITU MBAYA WADODGO ZAO TOTO AFRICA

Kiungo mshambuliaji wa Yanga, Haruna Niyonzima, akimramba chenga, beki wa Toto Africa, wakati wa mchezo wa Ligi Kuu ya Tanzania Bara, uliopigwa leo jioni kwenye Uwanja wa Taifa jijini Dar es Salaam. Katika mchezo huo Yanga ilishinda mabao 4-1.

***********************

MATOKEO MENGINE YA MECHI ZA LEO LIGI KUU TANZANIA BARA NI:-

COASTAL UNION 1- KAGERA SUGAR 0

YANGA SC 4-TOTO AFRICAN 1

STAND UNITED 3- MAJI MAJI FC 0

TANZANIA PRISONS 1- SIMBA SC 0

TIMU ya Yanga imezidi kujichimbia kileleni katika msimamo wa Ligi Kuu ya Tanzania Bara leo baada ya kuwaadabisha wadogo zao Toto African kwa kuwatekenya jumla ya mabao 4-1 katika mchezo uliopigwa kwenye Uwanja wa Taifa jijini Dar es Salaam.

Kwa ushindi huo sasa Yanga wameweza kufikisha jumla ya pointi 19 baada ya kupiga mechi saba, ikiwazidi kwa pointi tatu Azam FC ambao nao kesho wanashuka dimbani kukipiga na Ndanda FC mjini Mtwara.

Katika mchezo huo hadi mapumziko, Yanga SC walikuwa mbele kwa bao 1-0 lililofungwa na beki wa kulia, Juma Abdul dakika ya tisa kwa shuti kali umbali wa zaidi ya mita 20 akimaizia kona ya Haruna Niyonzima.

Hata hivyo, Yanga wangeweza kumaliza dakika 45 za kipindi cha kwanza wakiwa mbele kwa zaidi bao moja baada ya leo tena mshambuliaji wao Mzimbabwe Donald Ngoma, kukosa Penati.

Ngoma alikosa penalti hiyo dakika ya 45 ikipanguliwa na kipa wa Toto, Mussa Mohammed baada ya yeye mwenyewe kumnawisha mpira beki Carlos Protas na mwamuzi, Ahmada Simba wa Kagera kuamuru penati hiyo.

Katika kipindi cha kwanza, Toto walifanya shambulizi moja tu la maana, Miraji Athumani ‘Madenge’ akishindwa kumalizia vizuri pasi ya Edward Christopher dakika ya 42 kwa kumpa nafasi kipa wa Yanga SC, Ally Mustafa ‘Barthez’ kupangua.

Kipindi cha pili, Yanga SC walianza na mabadiliko Juma Abdul akimpisha Simon Msuva ambaye alikwenda kufunga bao la pili dakika ya 49.

Toto Africans ilipata bao lake dakika ya 62 kupitia kwa Miraj Athumani ‘Madenge’ kwa kichwa akimalizia mpira ulioparazwa na kipa Ally Mustafa ‘Barthez’ baada ya mpira wa adhabu uliopigwa na Bernad Evarigetus.

Mrundi Amissi Tambwe aliipatia Yanga SC bao la tatu dakika ya 81 akimalizia krosi ya Simon Msuva ambaye alifunga bao la nne dakika ya 90 akimalizia pasi ya Mbrazil Andrey Coutinho.

Beki wa Toto, Hassan Khatib alionyeshwa kadi ya pili ya njano dakika ya 90+ kwa utovu wa nidhamu na kutolewa kwa kadi nyekundu.

Kikosi cha Yanga SC: Ally Mustafa ‘Barthez’, Juma Abdul/Simon Msuva dk46, Mwinyi Mngwali, Kevin Yondan/Nadir Haroub ‘Cannavaro’, Vincent Bossou, Thabani Kamusoko, Donald Ngoma, Amissi Tambwe, Malimi Busungu na Godfrey Mwashiuya/Andrey Coutinho.

******************

Toto Africans: Mussa Mohammed, Hassan Khatib, Robert Magadula/Miraj Makka, Hamisi Kasanga, Carlos Protas, Salimn Hoza/William Kimanzi, Japhet Vedastus/Jaffar Mohammed, Abdallah Seseme, Evarigetus Bernad, Edward Christopher na Miraji Athumani.