MKUTANO WA MAWAZIRI WA AFYA WA SADC, TANZANIA KUTOKOMEZA TB IFIKAPO 2020

*Ilikuwa na kituo kimoja cha kutibu TB mwaka 2015 hadi vituo 103 mwaka 2019.

*Ni miongoni mwa nchi chache duniani yenye kiwango cha chini cha usugu wa dawa za TB yaani asilimia.

 Makamu wa Rais wa Jamhuri ya Muungano wa Tanzania, Samia Suluhu Hassan, akifungua Mkutano wa pamoja wa Mawaziri wa Sekta ya Afya na Ukimwi  kwa Nchi Wanachama wa Jumuiya ya Maendeleo Kusini mwa Afrika (SADC) Unaojadili Masuala mbalimbali ya afya,  Mikakati dhidi ya Ukimwi, kuangalia hatua iliyofikiwa katika utekelezaji wa Itifaki ya Afya ya SADC ya Mwaka 1999,  Mpango Mkakati wa Kanda wa Masuala ya Afya na kuridhia kwa pamoja Maazimio mbalimbali yanayohusiana na  Afya kwa Nchi za SADC.  Mkutano huo Umefunguliwa leo Novemba 07,2019 katika Ukumbi wa Mikutano wa Benki Kuu ya Tanzania (BOT CC) Jijini Dar es salaam. 

SERIKALI ya Tanzania imepiga hatua katika kutokomeza ugonjwa wa kifua kikuu (TB), kutokana na juhudi kubwa zinazofanywa na Serikali ya Awamu ya Tano chini ya Rais Dk. John Magufuli.

Akizungumza wakati wa kikao cha mawaziri wa afya na HIV/AIDS kwa nchi wanachama wa Jumuiya ya Maendeleo Kusini mwa Afrika (SADC), Makamu wa Rais wa Tanzania Mama Samia Suluhu Hassan jijini Dar es Salaam jana, alisema Tanzania ni miongoni mwa nchi saba duniani zilizofanikiwa kufikia malengo mkakati ya kutokomeza TB ifikapo mwaka 2020.

Katika kudhihirisha hilo, alisema mwaka 2015 wakati Serikali ya Awmau ya Tano ikiingia madarakani kulikuwa na kituo kimoja tu kinachotoa huduma za matibabu ya TB sugu, ambapo hadi kufikia Septemba 2019 vituo 103 vinatoa huduma hiyo.

“Katika mwaka 2018, maambukizi mapya ya TB yamepungua kwa kasi ya asilimia 4.6 kwa mwaka. Vifo vinavyotokana na TB vimepungua kutoka vifo 55,000 mwaka 2015 hadi vifo 39,000 mwaka 2018 ambayo ni sawa na asilimia  27.

“Utoaji taarifa za wenye TB umeongezeka kwa asilimia 20.6 kutoka mwaka 2015 hadi mwaka 2018. Hii inatokana na kuongezeka kiwango cha utambuzi wa ugonjwa huu kutoka asilimia 37 mwaka 2015 hadi asilimia 53 mwaka 2018,” alisema Suluhu.

Aidha, alibainisha Tanzania ni miongoni mwa nchi chache zenye kiwango cha chini cha usugu wa dawa za TB kwa kuwa na asilimia 0.3 ya usugu kwa wenye maambukizi mapya na asilimia 13 kwa wagonjwa waliokwishatibiwa.

  Akizungumzia mikakati ya Serikali ya Tanzania katika sekta ya afya, Makamu wa Rais alisema: “Kwenye suala la kufikia lengo la afya kwa wote, Serikali ya tanznaia imeweka kipaumbele katika kuimarisha miundombinu na mifumo ya afya hususan katika kuhakikisha huduma za afya zinazotolewa kwa kuzingaytia ubora na uwiano wa kijiografia.

“Katika kipindi cha miaka mine kuanzia mwaka 2016 hadi 2019 tumefanikiwa kuongeza ujenzi wa vituo vipya vya afya 352 katika maeneo mbalimbali, ngazi ya kata, hospitali 67 katika ngazi ya wilaya na hospitali sita za mikoa kwa ajili ya kurahisisha utoaji huduma za afya.”

Alibainisha, serikali imeongeza bajeti katika sekta ya afya kutika vyanzo vya ndani kuika Sh Bil 30 kwa mwaka 2015/16 hadi kufikia Bil 260 kwama mwaka 2019/20. KUSOMA ZAIDI BOFYA HAPA

Aidha, aliwataka mawaziri wa afya kutoka nchi wanachama za SADC kujadiliana kwa umakini kwa kuwa matokeo yoyote yanasubiriwa katika nchi zao kwa manufaa mapana ya jumuiya.

Awali akimkaribisha Makamu wa Rais, Waziri wa Afya, Maendeleo ya Jamii, Jinsia, Wazee na Watoto, Ummy Mwalimu alisema SADC ilisaini itifaki ya afya mwaka 1999 ambayo iliridhiwa mwaka 2004 kwa ajili ya kutoa mwongozo wa masuala ya afya na UKIMWI kwa nchi wanachama.

Ambapo, jumuiya ilianda mpango mkakati wa maendeleo wa kanda kwa kipindi cha miaka mitano kuanzia mwaka 2015 hadi 2020.

  “Kufuatia hatua hiyo, waheshimiwa mawaziri wamekuwa wakikutana kila mwaka kama tutakavyokutana leo (jana), kwa ajili ya kupitia utekelezaji wa program mbalimbali za afya na UKIMWI zilizoainishwa katika kipengele D cha mkakati huo,” alisema Ummy na kuongeza:

“Kama ilivyo utaratibu wa mikutano hii, wataalamu wa kisekta walikutana kwa siku tatu kuanzia Novemba 4 hadi 6 kwa ajili ya kujadili na kutoa mapendekezo juu ya masuala mbalimbali yanayohusu sekta ya afya na UKIMWI.”

Kwa upande wake, Katibu Mtendaji w  Sekretariet ya SADC, Dk. Stergomena Tax alisema kazi kubwa wanayoifanya ni kuhakikisha nchi wanachama wa SADC wanaimarisha afya za wananchi kwa kuishi vizuri.

“Tunahitaji mataifa yetu kuendelea kiuchumi, lakini hakuna uchumi imara bila afya bora. Tumebaini ugonjwa wa Malaria, TB na UKIMWI ni hatari kwa maendeleo yetu hivyo tumeahidi kupambana nayo hadi kuyatokomeza.

“Hata hivyo, changamoto kubwa tuliyonayo ni rasilimali. Ni muhimu kuungana pamoja kwa mikakati thabiti ili kutokomeza maradhi na changamoto za sekta ya afya. Ndiyo maana kesho (leo) tutazindua kampeni ya ‘Zero Malaria starts with me’ maana yake kutokomeza malaria kunaanza  na mimi. Hii ni siku ya SADC ya Malaria,” alisema Dk. Tax.

Tangu Agosti 17, 2019 Tanzania ilipokabidhiwa uenyekiti wa SADC ambapo kwa sasa Rais Dk. John Magufuli  atashikilia kiti hicho kwa muda wa mwaka mmoja, kumekuwa kukifanyika vikao vya mara kwa mara vya kisekta ili kufikia malengo ya jumuiya hiyo yenye lengo la kumaliza changamoto za ukanda huu wa Afrika.

SADC ina wanachama 16 ikiwemo Tanzania, Afrika Kusini, Botswana, Msumbiji, Angola, Malawi, Zambia, Lesotho, Comoro, Ushelisheli, Mauritius, Madagascar, Eswatini, Jamhuri ya Kidemokrasia ya Kongo (DRC), Zimbabwe na Namibia.

 Sehemu ya washiriki

 Katibu Mkuu wa SADC Dk. Stargomena Tax, akizungumza.

 Msanii wa muziki wa kizazi kipya, Barnaba Boy, akitoa burudani mbele ya wageni waalikwa katika Mkutano wa pamoja wa Mawaziri wa sekta ya Afya  na UKIMWI (HIV/AIDS) kwa nchi wanachama wa Jumuiya ya Maendeleo Kusini mwa Afrika (SADC), uliofanyika katika Ukumbi wa BOT jijini Dar es Salaam.

 

  Makamu wa Rais wa Jamhuri ya Muungano wa Tanzania, Samia Suluhu Hassan, akiagana na Katibu Mtendaji wa SADC Dkt. Stergomena Tax  baada ya kufungua Mkutano wa Mawaziri wa Sekta ya Afya na Ukimwi  kwa Nchi Wanachama wa Jumuiya ya Maendeleo Kusini mwa Afrika (SADC).

 Akiagana na Waziri wa Afya, Ummy Mwalimu.

Picha ya pamoja...